7:36 AM
 |
| Upacara Nyegara Gunung, raris kelanturang antuk ngelinggihang Dewa Hyang (Sulangai) |
.............. Lanjutan
Dharmawacana
"Ngaben Pinaka Upacara Mamarisudha Sawa, Ngewaliang
Sang Panca Maha Bhuta
ke Witnyane"
Sane ketah
mamargi, kalih soroh makadi; ngaben sarat, sekadi sawa preteka, sawa wedhana,
miwah asthi wedhana. Ngaben nista boya kaon, wantah upakaranyane kidikan
saihang ring ngaben sarat, sami suksemanyane mautama, manut sradha kecap sastra
Manusmrti caturtah sargah, sloka 228, maosang sapuniki : “yadiastun akidik
maturan, dulurin tapa, brata, yoga, semadi, mapakayun, mababaos, maparilaksana
sarwa suci, sami kabaos panca maha yajna, janten pitaranyane magegas nebus
dosan sentananyane”.
Manut ucap Lontar
Yama Purwana Tattwa ngaben sederana sane ketah kamargiang, kabaos
ngaben Mitra Yajna, manut pararem pasamuan agung ring Campuan Ubud warsa 1961,
indik tata cara pamargin ngaben Mitra Yajna sakadi puniki; kapertama, upacara
nyiramang/ngalelet, dudonan pamargi miwah upakaranyane katanganin olih Sang
Sadhaka. Selanturnyane layon di bale semangge aturang punjung, tataban asoroh
eedan. Kasurya suci asoroh eedan, lis, sgau , tepung tawar. Upakara tarpana
ring setra marupa : nasi angkep, bubuh pirata, panjang ilang, nasi rare, plok ketampil
(huter-huter, dendeng bandeng, kasturyan), guru, pras, soda panganten putih
kuning, lis asoroh eedan. Ring surya : suci asoroh, penyeneng, jerimpen, sayut
apasang, jaja petang warna, miwah tigasan saperadeg. Ring pawedan : suci, pras,
daksina, payuk, kuskusan, cedok, lis, prayascita durmangala, sekarura, kwangen
pangrekan, miwah sane lianan.
Banten ngaben sederana sami pateh wantah kabaos
matiosan, upami bubuh pirata kabaos jernang pirata pinaka gapgapan, kasturyan
kabaos dyus kamaligi pinaka panyucian. Ngaben sederana sane tan ngangge
bebangkit kabaos mabia sriakan. Sane ngangge bebangkit asoroh, tigang soroh
kawewehin antuk upakara pamlaspas sarana ngaben sampun kabaos ngaben sarat.
Napi malih ngangge bade, petulangan, naga banda miwah reruntutanyane, sebatak
hulu maplaspas ngangge bebangkit, janten akeh mabuatang prabia.
Ida
dane sareng sami, napi malih sane aturang titiang iwawu, prasida cutetang
titiang kadi asapuniki : napi dados jinah buat bekel seda, nyujur swarga loka?
Janten sami pamiarsa nyawis : nenten dados! Riantukan kearipan leluhur
miteketin : “bhawarta tanpa wakenpati, gunanta guna genta yanutaken”.
Suksemanyane : jinah utawi arta nenten dados bekelang seda, sane nuntun Sang
Hyang Atma ngungsi swarga loka wantah subha karma wesana. Sakwanten
pretisentana krama Bali ngamargiang sradha bhakti madasar yajna, mabuatang
prabia, patut seimbang. Jinah pinaka kasugihan sekala, kabuatang lwir prahu
linggihin ngalintangin segara (niasanyane Bandusa), subha karma wesana pinaka
kasugihan niskala, kabuatang lwir biduknya (kaniasayang antuk tali
mabakang-bakang), sane nuntun Sang Hyang Atma nyujur witnyane Sangkan Paraning
Dumadi.
Inggih,
dumogi atur titiang mawiguna buat pamiarsa ngamargiang swadharmaning
pretisentana suputra, mawastu asung Ida Sang Hyang Widhi Wasa nugraha
karahajengan, santha jagathita, sajeroning Bhinneka Tunggal Ika. Nenten lali
titiang nunas geng pangampura, prade iwang kirang langkung titiang matur.
Kaping untat titiang ngaturang paramasanthi,
Om Santhi, Santhi,
Santhi Om
0 comments